兔仔新手入門指南：飼養基本知識

兔仔需要好大空間先可以健康成長。最基本嘅要求係籠最少要有4呎長，足夠畀佢哋跳躍同伸展。好多寵物店賣嘅細籠根本唔適合兔仔長期居住，只可以作為運輸用途。

除咗籠要夠大，每日仲要最少有3-4小時嘅放風時間，畀佢哋喺安全嘅空間自由走動、跳躍同探索。長期困喺細籠嘅兔仔，容易出現抑鬱同行為問題。

兔仔係好鍾意清潔嘅動物，佢哋會自己搵一個角落做廁所。你只需要喺佢哋揀咗嘅位置放一個兔仔廁所，鋪上木粒或紙粒，每日清理就可以。兔仔係可以訓練去廁所嘅，佢哋好聰明㗎！

兔仔嘅飲食結構非常簡單但重要：

無限供應：提摩西草（Timothy Hay）係兔仔最主要嘅食物，佔每日飲食80%以上。無限量供應嘅乾草對兔仔嘅腸道蠕動同牙齒磨損極之重要。

每日新鮮蔬菜：大約成人拳頭咁大份量，可以比油麥菜、小棠菜、甘筍葉、西芹、火箭菜、白菜仔。記得要洗乾淨瀝乾水先餵。

限量兔糧：每日早晚各一湯匙就夠，唔好貪多。揀無添加色素同穀物嘅優質兔糧。

以下食物對兔仔好危險，一定要記住：

生菜（Iceberg Lettuce）：含有催眠物質兼且營養價值極低，會引致肚痾。羅馬生菜都唔建議。

薯仔、蕃薯：含有龍葵鹼，對兔仔有毒。

洋蔥、大蒜、蔥：會破壞紅血球，引致貧血。

朱古力、咖啡、茶：含有咖啡因同可可鹼，會影響心臟同神經系統。

牛油果：含有persin，對兔仔嚟講係有毒物質。

人類零食、麵包、餅乾：高糖高淀粉，兔仔消化系統完全應付唔到。

兔仔超級怕熱！佢哋身體主要透過耳朵散熱，但效率有限。當氣溫超過28°C，兔仔就有中暑風險。夏天一定要保持通風，可以開冷氣或者擺冰種喺籠邊。

千祈唔好直接曬太陽！兔仔嘅籠一定要放喺陰涼通風嘅位置，避免陽光直射。香港夏天又熱又濕，好多兔仔中暑嘅個案都係因為主人擺咗個籠喺窗邊。

冬天就要注意保暖，可以鋪多啲乾草或者用寵物專用嘅暖墊。但唔好用暖風機直接吹住佢哋，會令佢哋皮膚乾燥。

牙齒：兔仔嘅牙齒係不斷生長嘅，所以要靠食乾草嚟磨牙。如果牙齒過長，會導致食慾不振、流口水、下巴生瘡。建議每半年搵獸醫檢查一次牙齒。

大便檢查：兔仔嘅大便係健康嘅指標。正常大便應該係圓形、乾身、大小均勻。如果突然變細、變軟、有黏液或者冇大便，就係有問題嘅警號。盲腸便（似一串提子）係正常嘅，兔仔會自己食返吸收營養。

絕育：強烈建議幫兔仔絕育！雌兔未絕育有80%機會喺3-4歲後患上子宮癌。絕育後嘅兔仔性情會更穩定，亦減少噴尿等行為問題。

兔仔雖然唔會出聲，但佢哋有好多行為訊號可以話畀你知佢嘅心情：

踩腳（Stamp）：後腳用力踩地，發出「嘭嘭」聲。代表佢好嬲、好驚或者警告你有危險。通常係因為見到陌生人、大聲響或者唔鍾意嘅事。

轉圈（Circling）：喺你腳邊不停轉圈，係開心興奮嘅表現！好多時係想食嘢或者想同你玩。發情期嘅兔仔都會有呢個行為。

躺平（Flopping）：突然成隻側身攤平喺地下，好似死咗一樣。放心，呢個係兔仔極度放鬆、好有安全感嘅表現。見到兔仔Flopping，代表佢好信任你！

噴尿：未絕育嘅兔仔（尤其係公兔）會噴尿嚟標記地盤。絕育後呢個行為會大大減少。

舔你手：係親密嘅表現，兔仔舔你等於同你講「我鍾意你」。